D витамин нь кальцийг нарийн гэдэсний ханаар шимэгдэхэд нөлөөлснөөр цусан дахь калцийн хэмжээ нэмэгдэж, яс руу зөөгдөн, ясны бат бөх чанар нь нэмэгддэг. Энгийнээр бол бага насны хүүхдийг рахитаас сэргийлж, ахимаг насны хүнийг ясны сийрэгжилтээс хамгаалдаг амин дэм юм. Д аминдэмийг нарны гэрэл, хоол хүнс гэсэн хоёр эх үүсвэрээс авах боломжтой. Энгийн үед биед хоол хүнсээр авч байгаа кальцийн 15% шимэгддэг бол Д аминдэм ууснаар 65% болж нэмэгддэг. Хүн өдөрт хүнснээс 500-800 мг кальци авах ёстой бол өсөлтийн идэвхтэй насанд түүнээс ихийг шаарддаг. Эмэгтэй хүний сарын тэмдэг зогсох үед өндгөвчний ялгаруулах даавар багассанаар бамбай булчирхайнд нөлөөлж, кальцийг яснаас цусанд нийлүүлж эхэлдэг. Үүнээс эмэгтэйчүүдийн ясны сийрэгжилт үүсдэг. Тиймээс кальци, Д аминдэм маш чухал юм. Д аминдэм дутагдалтай байх нь сэтгэл гутралтай болох магадлалыг нэмэгдүүлэх ба сэтгэл гутралыг хүндрүүлэх сөрөг нөлөөтэй. Тархины эд эсэд Д аминдэмийн дутагдал нь нөлөөлж, сэтгэл гутралыг үүсгэдэг нь олон тооны судалгаагаар батлагдсан байдаг.